नवीन तंत्रज्ञानाचे संकट: एआयच्या साहाय्याने होणारी डिजिटल चोरी
सध्या जगभरात तंत्रज्ञानाने अमुलाग्र
बदल घडवले आहेत. आज आपण पेपरलेस युगात प्रवेश केला आहे. सर्व व्यवहार ईमेल,
मेसेजेस आणि ऑनलाइन प्लॅटफॉर्म्सद्वारे केले जात आहेत. या आधुनिक व्यवस्थेला एक
मोठा धोका निर्माण झाला आहे – एआय म्हणजेच कृत्रिम बुद्धिमत्तेचा.
मायक्रोसॉफ्टने सादर केलेल्या
‘कोपायलट स्टुडिओ’ नावाच्या नव्या एआय टूलमुळे संगणक स्वतःच चालवू शकतो.
स्क्रीनवरील प्रत्येक बटण, मेन्यू, फॉर्म, किंवा ड्रॉपडाउन ओळखून स्वतःहून योग्य
क्रिया करतो. म्हणजे आता संगणक वापरण्यासाठी माणसाची गरज उरलेली नाही. हे टूल
कोणताही बटण शोधू शकते, बदल समजू शकते, आणि आपल्यासारखं अचूक काम करू शकते.
या टूलमुळे सर्वात मोठा धोका निर्माण
झाला आहे तो आहे साइबर सिक्युरिटीचा. यामुळे ‘कॅप्चा’सारख्या
सुरक्षाव्यवस्था निष्प्रभ ठरू शकतात. पूर्वी कॅप्चा हे संकेत होते की दुसऱ्या
बाजूला खरोखर माणूस आहे, कारण गुंतागुंतीचा आकृतीबंध ओळखणे आणि टाकणे हे
संगणकासाठी अशक्य होते. पण आता हे एआय टूल तेही सहज करू शकते.
या कोपायलट टूलद्वारे, एआय आता
कोणतीही सरकारी वेबसाइट उघडून, त्यात फॉर्म भरून, फोटो अपलोड करून आणि स्क्रीनशॉट
पाठवून काम पूर्ण करू शकते — तेही कोणत्याही API (Application Programming
Interface) एक्सेसशिवाय. यामुळे सध्या सुरक्षित मानले जाणारे सर्व डिजिटल दरवाजे
खुले झाले आहेत.
या तंत्रज्ञानाचा गैरवापर केल्यास
एखादा हॅकर तुमच्या संगणकावर नियंत्रण मिळवू शकतो. तुम्हाला वाटतं की संगणक बंद आहे,
पण एआय बॅकएंडमध्ये काम करत असतो – तो फॉर्म भरू शकतो, ओटीपी टाकू शकतो, पासवर्ड
बदलू शकतो, बँक खात्यातून पैसे हस्तांतरित करू शकतो. सर्वात मोठा धोका असा की हे
सर्व वापरकर्त्याच्या नकळत होऊ शकते.
सध्या हॅकर्स वेगवेगळ्या वेबसाइट्सवर
बनावट बँकिंग माहिती टाकून लोकांकडून माहिती घेतात. एकदा एखादा मेल आला की
"हे स्टेट बँक ऑफ इंडियाकडून आलेलं ट्रान्झॅक्शन स्टेटमेंट आहे", तुम्ही
ते उघडता, आणि त्यात एक बॅकएंड सॉफ्टवेअर तुमच्या संगणकात इन्स्टॉल होतं – आणि मग
कोपायलट एआय तुमच्या संगणकावर काम करू लागतो.
हे तंत्रज्ञान जसजसे सर्वसामान्य
लोकांच्या संगणकात येईल, तसतशी धोखाधडीची प्रकरणे वाढतील. हे केवळ वैयक्तिक
माहितीपुरते मर्यादित नाही, तर राष्ट्रीय सुरक्षेचा प्रश्न देखील निर्माण करू
शकते. कारण सर्व्हर परदेशी असतात, कंपन्यांचे नियंत्रण तेथून चालते आणि त्यामुळे
भारतासारख्या देशांवर परकीय तंत्रज्ञानाच्या माध्यमातून दडपशाही केली जाऊ शकते.
निष्कर्ष:
तंत्रज्ञान मानवाच्या मदतीसाठी विकसित झाले आहे, पण जर ते नियंत्रणाच्या बाहेर
गेले, तर तेच तंत्रज्ञान विनाशाचे कारण बनू शकते. अशा नव्या एआय टूल्सचा वापर
करताना अत्यंत सावधगिरी बाळगणे गरजेचे आहे. सरकार, तंत्रज्ञान कंपन्या आणि सामान्य
नागरिक यांच्याकडून योग्य खबरदारी आणि नियमांची गरज आहे, जेणेकरून ही डिजिटल
क्रांती मानवजातीसाठी फायदेशीर आणि सुरक्षित राहील.